ხელოვნების უნივერსიტეტის მუსიკის ფაკულტეტის პროფესორ-კონსულტანტს ალექსანდრა (დოდო) ჯვარშეიშვილს დაბადებიდან 85 წელი შეუსრულდა.ნაყოფიერი პედაგოგიური და შემოქმედებითი საქმიანობისათვის დაჯილდოვდა უნივერსიტეტის საპატიო სიგელით და გადაეცა ფულადი ჯილდო. უნივერსიტეტის რექტორმა ე. მესხიამ საპატიო სიგელი გადასცა და მადლობა გადაუხადა წლების მანძილზე დაუღლავი შრომისათვის, ჯანმრთელობა და წარმატებები უსურვა. იუბილარს მიესალმნენ კოლეგები და სტუდენტები.

რეჟისორმა ლაშა ცქვიტინიძემ და პროდიუსერმა ნოდარ ნოზაძემ ჩაატარეს მასტერკლასი, საუბარი შეეხო ფილმის გადაღების მოსამზადებელ, გადასაღებ და სამონტაჟო პროცესებსა და სცენარზე მუშაობის სპეციფიკას. ნაჩვენები იყო ლ. ცქვიტინიძის მოკლემეტრაჟიანი ფილმი „თემო“.

ბათუმის ხელოვნების უნივერსიტეტს სტუმრად ეწვია საქართველოს საპატრიარქოს წმინდა თამარ მეფის სახელობის სასწავლო უნივერისტეტის დელეგაცია უნივერსიტეტის რექტორის არქიმანდრიტ ადამ ვახტანგ ახალაძის ხელმძღვანელობით. გაიმართა შეხვედრა უნივერსიტეტების პროფესორ-მასწავლებლებს შორის ერთობლივი სასწავლო და შემოქმედებითი პროექტების მომზადების თაობაზე. არქიმანდრიტ ადამ ვახტანგ ახალაძემ ბათუმის ხელოვნების უნივერსიტეტს საჩუქრად გადასცა წმინდა თამარ მეფის სახელობის სასწავლო უნივერისტეტის ახალი ბეჭდვითი გამოცემები. შეხვედრის დასასრულს რექტორებმა ხელი მოაწერეს უნივერსიტეტებს შორის ურთიერთთანამშრომლობის მემორანდუმს.

გაიმართა დისკუსია ფრიდონ ხალვაშის პირადი დღიურებისა და ბოლო წიგნის ,,ომრის” შესახებ. შეხვედრას ადგილობრივთან ერთად თბილისიდან და ქუთაისიდან მოწვეული მწერლები ესწრებოდნენ. მწერლებმა კოლეგის მიერ განვლილი გზა გაიხსენეს და ფრიდონ ხალვაშის შემოქმედებიდან ამონარიდები წაიკითხეს. შეხვედრაზე იმ პრობლემებზეც გაამახვილეს ყურადღება, რომლებიც თანამედროვე ქართული ლიტერატურის წინაშე დგას. დისკუსიას ლიტერატურული პრემის ,,საბას” გამარჯვებული, კრიტიკოსი ელგუჯა თავბერიძეც ესწრებოდა.

ბათუმის ხელოვნების უნივერსიტეტს სტუმრად ეწვია ბერლინის (გერმანია) ტექნიკური უნივერსიტეტის პროფესორი ვოლფგანგ ვენგი. როგორც სტუმარმა აღნიშნა, ბერლინის ტექნიკური უნივერსიტეტი მრავალპროფილიანი უმაღლესი საგანმანათლებლო დაწესებულებაა. უნივერსიტეტს გააჩნია ჰუმანიტარული და სოციალური მეცნიერებების ფაკულტეტები. ვოლფგანგ ვენგიმ შეხვედრები გამართა კულტურისა და ხელოვნების მენეჯმენტის, კინო და ტელერეჟისორის სპეციალობების სტუდენტებთან ფილმის გადაღების, კულტურული ტურიზმის მენენჯმენტისა და გაცვლითი პროგრამების თანამედროვე აქტუალურ პრობლემებზე. ვოლფგანგ ვენგიმ აღუთქვა სტუდენტებს, რომ კვლავ ეწვევა ხელოვნების უნივერსიტეტს და ჩაატარებს ლექციებს ეკოტურიზმისა და აგრარული ტურიზმის თემებზე.