„ხელოვანთა ხელშეწყობის პროგრამის“ ფარგლებში დღეს ერთდღიანი ფოტოგამოფენა გაიხსნა. ხელოვნების უნივერსიტეტის სტუდენტებისა და მოყვარული ფოტოგრაფების მიერ გადაღებული ფოტოები, სულ 70-მდე ნამუშევარი, ხელოვნების უნივერსიტეტში გამოიფინა. მათ შორის მოხვდა „მაცნეს“ ჟურნალისტის სულხან მესხიძის სამი ფოტონამუშევარიც. სპორტისა და ახალგაზრდობის საქმეთა დეპარტამენტის მიერ 10 ათასი ლარით დაფინანსებული პროექტი წლის ბოლომდე ჯამში 8 აქტივობის განხორციელებას ითვალისწინებს. პროექტის ხელმძღვანელის თქმით, პროგრამა ახალგაზრდა ხელოვანებს საშუალებას აძლევს საკუთარი შემოქმედება ფართო მასებს გააცნონ.

ხელოვნების უნივერსიტეტის პერიოდულ გამოცემას „ხელოვნებათმცოდნეობითი ეტიუდები“ შეემატა უნივერსიტეტის გამომცემლობა. საქართველოს პარლამენტის ეროვნულ ბიბლიოთეკასა და ხელოვნების უნივერსიტეტს შორის გაფორმებული ურთიერთთანამშრომლობის მემორანდუმის ფარგლებში საქართველოს პარლამენტის ეროვნულ ბიბლიოთეკასა და ხელოვნების უნივერსიტეტს შორის ხელი მოეწერა ხელშეკრულებას ISBN-ის საგამომცემლო პრეფიქსის მინიჭების შესახებ. ხელშეკრულების საფუძველზე ხელოვნების უნივერსიტეტის გამომცემლობის მიერ გამოცემული სასწავლო, სამეცნიერო და სხვა სახის ლიტერატურა იქნება ოფიციალურად აღიარებული ქვეყანაში დადგენილი სტანდარტების მიხედვით.

2014 წლის 6 ოქტომბრიდან 11 ოქტომბრის ჩათვლით ხულოში, შუახევში, ქედასა და ბათუმში ა(ა)იპ „პერსონაჟი“ და აჭარის ა.რ. განათლების, კულტურისა და სპორტის სამინისტრო ანიმაციური ფილმების მე–6 საერთაშორისო ფესტივალს „თოფუზს“ ატარებს. ფესტივალის მიმდინარეობის პერიოდში ხელოვნების უნივერსიტეტში დაგეგმილია ვორქშოპებისა და მასტერკლასების სერია. ფესტივალის განმავლობაში საკონკურსო და საინფორმაციო პროგრამებში ნაჩვენები იქნება 38 ქვეყნის 105 ფილმი. ფილმების ჩვენებები გაიმართება კინოთეატრ „აპოლოში“, ბათუმის დრამატულ თეატრში, ხელოვნების უნივერსიტეტში, ხულოს დრამატულ თეატრში, შუახევისა და ქედის კულტურის ცენტრში. ფესტივალის გამარჯვებულებს გამოავლენს საერთაშორისო ჟიური, ხოლო საუკეთესო საბავშვო ფილმს გამოავლენს ხულოს, შუახევის, ქედისა და ბათუმის ბავშვებისგან დაკომპლექტებული ჟიური. შედეგები გამოცხადდება ფესტივალის დასკვნით ღონისძიებაზე.

4-5 ოქტომბერს ბათუმის ხელოვნების უნივერსიტეტის მუსიკის ფაკულტეტის სტუდენტებისთვის საჯარო ლექცია და მასტერ-კლასი ჩაატარა თბილისის ვ.სარაჯიშვილის სახელობის სახელმწიფო კონსერვატორიის ასოცირებულმა პროფესორმა, მუსიკოლოგიის დოქტორმა ნინო ჟვანიამ. ლექცია მიეძღვნა თანამედროვე საფორტეპიანო საშემსრულებლო ხელოვნების პრობლემებს.

ხელოვნების უნივერსიტეტის რექტორს 1999-2004 წლებში, პროფესორ გიზო ჟორდანიას დაბადებიდან 80 წელი შეუსრულდა. ღვაწლმოსილ პედაგოგს სტუდენტებმა და პროფესორ-მასწავლებლებმა გულთბილი შეხვედრა მოუწყვეს სასცენო ხელოვნების დეპარტამენტში. უნივერსიტეტის რექტორატის გადაწყვეტილებით გიზო ჟორდანია დაჯილდოვდა საპატიო სიგელითა და გადაეცა სამახსოვრო საჩუქარი. სტუდენტებთან შეხვედრისას ხელოვანმა ბათუმთან დაკავშირებულ წლებსა და მოღვაწეობაზე ისაუბრა. ამჟამად გიზო ჟორდანია საოპერო სპექტაკლ "კარმენზე" მუშაობს, რომლის პრემიერა ბათუმის ხელოვნების ცენტრში 1 ნოემბერს გაიმართება.ხელოვნების უნივერსიტეტი ულოცავს ღვაწლმოსილ პედაგოგს საიუბილეო თარიღს და უსურვებს ხანგრძლივ სიცოცხლეს, ჯანმრთელობასა და შემოქმედებით წარმატებებს.